___________________________________________________________

20-02-1953 Dörp en Stad

IN MEMORIAM Dr Ir S. L. LOUWES

Op n 25sten Jannewoarie is in ’n Hoag overleden ons lid van verdienste Dr Ir S. L. Louwes, Direkteur van de Voedselvoorziening in Nederland.
Louwes was n man van groot formoat.
Hai wuir in 1889 in de Westpolder bie Ulrum geboren, bezöcht de Landbouwschool in Wageningen en wuir tou landbouwleroar en -consulent in Schagen, Meppel en Hengelo.
In 1918 is hai benuimd tot sikketoares-penningmeester van de Overijsselse Maatij. van Landbouw.
In dij tied was hai ook lid van de Stoaten en vaaier joar Gedeputeerde van de Pervinzie Overiesel. 

In 1935 wuir Louwes regeringscommesoares veur ’t uutvoerenvan de Tarwewet en loater laaider van ’t Rieksburo veur de „Voedselvoorziening” in oorlogstied. In 1940 kreeg hai zien tegenwoordege funksie.
Louwes het baargen waark verzet. Zo was hai joarenlaank veurzitter van ’t Ned. Genootschap veur Landbouwwaitenschoppen, adviseur van John Boyd Oss, Direkteur-Generoal van de Landbouworgoanisoatsie van de Verainegde Naties.
Ook was de overledene veurzitter van de Ned. delegoatsie veur landbouw, visserij en voedselvoorziening van de Benelux.
Den muik hai verder nog dail uut van de Europese economiese soamenwaarken. 

Wie willen aal ’t waark, dat Louwes doan het, hier nait opnuimen, moar misschien het hai wel te veul van zien krachten vaargd veur ’t algemain belang.
Grunnen het aan hom hail wat verloren. Hai was n groot Grunneger en n groot Nederlander der bie.

Wie zellen Dr Ir Louwes in hoge ere hollen. 

* * *

En nou komt ook nog ’t bericht van overlieden van EPPO TJARKO ROOKMAKER in Bennewòl; weer n lid van verdienste, dij wie verlaizen, moar in hoge ere holden. 

DEELMAN.

___________________________________________________________

Naar Gebroeders Louwes