Menu +

Aly Freije ‘SNIJHOAS BIE ZUURDIEK’

oet n snij-jacht over horizon glipt
over kòlde vlaktes hongerg òfdwoald
zigzag kommen laangs bochten van t Raidaip
ligt hai onderdoken tegen graftwale, laange oren plat
over zien nekke sloagen, bòlle ogen keerd noar mie
in oavend zet ik brood en greunte
wait k hom doar

snij vörmt roggen op d’ loanen, veur mien roamen
n hoog duun, n groot sloapend mouderdaaier

meschain dat hai dizze naacht mit mie
onder dij overhellende raand in loagde schare
t waarm kriegen zol, soamen liggend onder opwaaide withaid
tegen de ronden van n zaachte buuk

moar over laange widde vurgen keert hai weerom
twij pootòfdrukkens noast mekoar
zien achterpoten der lichtjes achteraan
op t ritme van zien sporen
terogge noar n aigen parallelle wereld.

Aly Freije